With "Youssef Talks"

 لقاءات مع يوسف عبد المجيد في قناته‫:

Youssef Talks

اللقاء الأول‫:

سلسلة التعديلات اللانهائية

هذا المقال من سلسلة الحديث عن العلم الزائف‫:  كيف تتعرف علي العلم الزائف ‫، خواطر حول المنهجية العلمية ، كيف ولماذا نتعامل مع العلم الزائف ، العلم الخطأ والعلم الزائف و قائمة التخاريف العلمية العربية‫.‫

***************************************

نقطتين تعرف بيهم الفرق بين العلم والعلم الزائف ‫، الأولانية متخصصة شوية وتطبيقها غالباً محتاج متخصصين ‫، والتانية سهلة جداً أي حد يستخدمها ‫(‫للي بيسألوني نعرف العلم الزائف إزاي‫)‫‫:

النقطة الأولانية هي القابلية للتخطيء ‫(‫‫Falsifiability)‫ دي من أهم الخواص التي تفرق بين العلم والعلم الزائف‫.‫ ملخصها كالتالي‫: أي فكرة علمية حقيقية يجب أن تحتوي بداخلها الإجابة علي السؤال‫:
‫"‫ماهو الشيء الذي لو رأيناه أو إكتشفناه أو قسناه أو رصدناه أو وجدناه كنتيجة لمعادلة رياضية يثبت أن الفكرة نفسها خاطئة‫؟‫"‫
لازم يكون فيه رد علي السؤال ده ‫، والرد يكون من داخل الفكرة نفسها ‫، ولو لم يكون هناك رد تصبح الفكرة إما هي علم زائف ‫، أو هي ليست تحت نطاق العلم التجريبي أصلاً‫.‫ يعني ممكن تكون تحت حاجة تانية من العلوم الإنسانية مثلاً‫.‫ بعض النظريات العلمية الحقيقية ممكن تعدي في مرحلة مؤقتة يبدو فيها كما لو كانت غير قابلة للتخطيء ‫، وده عادي خصوصاً لما تكون فكرة جديدة في مهدها‫.‫ وهنا بندخل مع الشرط ده شروط تانية زي إتباع الفكرة للمنهجية العلمية وتفاصيل تانية يعرفها المتخصصين ‫‫(‫‫شوف مقالاتي عن العلم الزائف في مدونتي لمزيد من التفاصيل‫)‫‫. ‫ علشان كدة النقطة الأولانية دي صعبة شوية إن حد غير متخصص يستعملها‫.‫
نقطة تانية وهي أسهل علي غير المتخصص إستخدامها‫.‫ دي إلي ممكن تسميتها ‫"‫مشكلة سلسلة التعديلات اللامتناهية‫‫"‫.‫ ودي منتشرة قوي‫ علي السوشيال ميديا وإلي حد كبير تعتبر نسخة مصغرة من القابلية للتخطيء.‫ تسأل حد سؤال محدد حول فكرة هو متقدم بها أو بيروجها ‫، يقولك الإجابة كذا ‫، نقول مثلاً س ‫، تروح إنت مفندله الإجابة س ‫، علشان لا يعترف إنه كان غلطان يروح هو معدل الإجابة من س إلي ص ‫، تفندله ص ‫، يروح معدل ص إلي ع ‫، وهكذا في سلسلة لا نهائية من التعديلات كل الهدف منها إنه يصل إلي نقطة لا تستطيع أنت تفنيدها‫.‫ وغالباً التعديل النهائي لما بيكون جاب أخره بيكون بيدور حول نظرية المؤامرة بشكل أو بأخر‫.‫ لأنه مش عارف يعدل تعديل علمي ما يبقاش قدامه غير إتهامك إن سؤالك قائم علي فوتوشوپ مثلاً أو نوع من النصب‫.‫
الأفروسنتريك وصلوا لدرجات عليا من الحتة الأخرانية دي‫.‫ إبتدت في الفترة الأخيرة تطلع نغمة إن التماثيل زي قناع توت عنخ أمون مزورة!‏!‏!‏ وإن الأصل كانت ملامحه أفريقية من جنوب الصحراء الكبري ‫، لكن الأثريين دمروا الأصلي وعملوا واحد بملامح جديدة‫.‫ إنها مؤامرة!‏!‏
بس دي علامة كويسة ‫، لأن معناها إنهم وصلوا لأخرهم ومابقاش قدامهم غير إدعاء المؤامرة‫.‫
طيب إيه الحل‫ مع الناس دي؟ مش حنقعد بقي معاهم ماشيين في سلسلة لانهائية!‏ مش فاضيين إحنا يا عصام‫.‫ الحل هو عدم الصدام معاهم.‫ لأنه ببساطة لا طائل من الحوار.‫ لو عايز تواجههم الأفضل إنك إنت بنفسك تنشر العلم الصحيح‫.‫ إنتشار العلم الصحيح الحقيقي هو الطريقة الوحيدة لتدمير هؤلاء‫.‫
عن نفسي أنا لا أناقش الشخصيات التالية‫:
الأفروسنتريك ‫، المسطحين ‫، منكرين التطور ‫، منكرين رحلات القمر ‫، الهوموفوبز‫ ‫، مدعين إن كورونا مؤامرة ‫، والأنتي ڤاكسرز بتوع تطعيمات الأطفال بتجيب توحد‫.‫ كلهم واحد بالنسبالي‫.‫ بديهم بلوك بس‫.‫

https://www.facebook.com/moataz.emam.007/posts/pfbid08dKJjwayfe5syMvtCN5QgMzxpACbEu4NEABZSRqGusdPAiphZzcGewMGTVBFvuW9l

الفرق بين الأنثروپولوجيا والأركيولوجيا

من ملايين السنين كان فيه كائنات تعيش في أفريقيا ‫، هذه الكائنات تطورت تطوراً بيولوجياً عبر الزمن ومنها ظهرت فصائل مختلفة زي

Sahelanthropus tchadensis من حوالي 7 مليون سنة في تشاد ‫(‫‫مش معناها إنهم تشاديين ‫، مكانش فيه بشر أصلاً علشان يبقي فيه بلاد أو ثقافات أو حضارات)‫.
Orrorin tugenensis حوالي 6 مليون سنة (كينيا ومش معناها إنهم كينيين‫‫)‫.‫
Ardipithecus ramidus ‫"‫أردي‫"‫ ‫، حوالي 4.4 مليون سنة (إثيوبيا ومش معناها إن ‫"‫أردي‫"‫ إثيوپيين)‫.‫‫ وهو مهم جداً ‫لأنه أول كائن من أسلافنا مشي علي قدمين إتنين‫.‫
وبعدين الAustralopithecus afarensis المشهور بإسم ‫"‫لوسي‫‫"‫.‫
ومن حوالي إتنين مليون سنة ظهر
Homo erectus
وهو أول من وقف تماماً وفرد ضهره ‫، وكان بدايات ظهور أدمغة كبيرة تستطيع التفكير والإكتشاف‫‫.‫ بعضاً منه هاجر برة أفريقيا إلي أسيا وأوروپا‫ والبعض فضل في أفريقيا‫.‫ بمرور الوقت إبتدت تظهر كائنات أشباه البشر المختلفة زي ال
Homo heidelbergensis ‫(‫وده غالباً الفرع إلي إحنا تطورنا منه‫‫)‫.‫
Homo neanderthalensis
Homo naledi
Homo floresiensis
Homo luzonensis
Homo denisova
وغيرهم من أشباه البشر إلي عاشت مع بعض في تقريبا نفس التوقيت في أماكن مختلفة من العالم‫.‫

نيجي بقي للنقطة المهمة‫: البشر العاقلين إلي هم إحنا Homo sapiens ظهروا من فروع Homo erectus إلي فضلت في أفريقيا ‫، وأقدم حفرية ليهم وجدت في المغرب وعمرها تلتميت ألف سنة‫ وهناك أدلة إنهم إنتشروا في أنحاء مختلفة من أفريقيا زي كينيا وإثيوپيا‫.‫

بس هنا لازم نكرر تاني إن ده مش معناه إن الإنسان أصله إثيوپي أو كيني أو مغربي!‏ موضوع التصنيفات العرقية ده لم يظهر غير بعدين‫ جداً.‫ إحنا هنا بنتكلم علي ظهور الجنس البشري أصلاً ‫، قبل ما يبقي فيه أسويين أو بيض أو أي عرقية حديثة!‏

خلينا نكمل‫: من حوالي 60–70 ألف سنة، مجموعات صغيرة من الـ homo sapiens بدأت تخرج شمالاً من شرق أفريقيا بحثاً عن الموارد. الموجة دي بالتحديد هي اللي كل البشر خارج أفريقيا جايين منها ‫(‫‫بما فيها الأسيويين بحضاراتهم المختلفة والبيض والمايا والأزتك ‫، كله كله)‫!‏ ‫ومن تبقي في أفريقيا هم أجداد الأفريقيين المعاصرين‫‫.‫ في الأغلب المجموعات دي خرجت من مضيق باب المندب وشبه جزيرة سيناء وإنتشرت في أسيا وأوروپا‫ ومنهم إلي الأمريكتين في ما بعد.‫
أكرر‫: أفارقة جنوب الصحراء الكبري هم أحفاد المجموعة إلي فضلت ‫، وباقي البشر إلي في باقي العالم هم من الموجة إلي هاجرت دي‫.‫ واضح‫؟ دي نقطة مهم توضيحها‫.‫

المجموعات إلي هاجرت دي قابلت بعض الفصائل الأخري زي ‫"‫النياندرثال‫"‫ مثلاً في أوروپا وحصل بينهم تزاوج وحصل برضه صراع علي المصادر لحد ما كل الأنواع التانية إنقرضت وفضلنا إحنا‫.‫ وبعدين إبتدت المجموعات المختلفة تطور بشكل بطيء إلي الأعراق والأجناس المختلفة زي الأسيويين والبيض والإسكيمو وسكان أمريكا إلخ إلخ‫.‫

ركز بقي في الحتة إلي جاية دي‫:

في حوالي ما بين تلاتين لعشرين ألف سنة مجموعات مهاجرة من مناطق مختلفة ‫وصلوا وادي النيل بحثاً عن الماء في فترات متفاوتة ‫، البعض جايين من الشمال ‫الشرقي (‫‫أحفاد بعض المجموعات إلي هاجرت زمان)‫ ووصلوا وادي النيل‫ ‫، والبعض جت من الصحراء الكبري ‫، والبعض من النوبة وما يسمي اليوم بالسودان ‫، إلي ترجع أصولهم من المجموعات البشرية إلي فضلت في أفريقيا أيام الهجرة الأولي‫.‫ وحصل هنا إستيطان لوادي النيل‫.‫ وهذه المجموعات المختلفة إختلطت جينيا وأصبحت ما يمكن تسميته اليوم مجازاً بالمصريين القدماء‫ قوي قوي. ‫(البحث عن الأنهار إلي أدي لإستيطان وادي النيل كان برضه السبب في إستيطان الأنهار الكبري زي الفرات وزي أنهار الصين والهند وظهور الحضارات الزراعية القديمة)‫‫.‫

النقطة الأخيرة دي مهمة جداً جداً جداً‫‫.‫ مش معني إن تكوين المصري القديم جداً كان جزء منه جاي من جنوب الصحراء الكبري إن معني كدة إن الأفروسنتريك معاهم حق زي بعض الناس ما فهمت‫.‫ الإختلاط ده حصل من أزمان قديمة جداً والثقافة المصرية والعرق المصري أيضاً خرج من هذا الخليط وأصبح ثقافة ‫، بل وعرقية ‫، مستقلة تماماً عن الأصول القديمة للمجموعات المهاجرة إلي إتقابلت وإختلطت علي مدي ألاف السنين‫.‫ قبل كدة مكانش فيه عرقيات أو ثقافات أصلاً‫.‫

وفيه أدلة تاريخية علي حضارات مصرية بدائية جداً زي حضارة بداري ونقادا الأولي والتانية والتالتة‫.‫ هذه الأخيرة هي إلي بدأت أنظمة الحكومات والزراعة وبدأت الممالك الصغيرة إلي قعدت تتوحد لحد ما توحدت تماماً علي يد الملك مينا موحد القطرين وبداية تدوين التاريخ‫.‫

الأفروسنتريك بقي بيستغلوا جهل الناس بالقصة ده وبيقولوا إنهم المصريين الحقيقيين ‫، صحيح إن البشرية الحديثة ظهرت أول ما ظهرت في أفريقيا ‫، ومن هذا المنطلق بالفعل نحن كلنا أفارقة ‫‫(‫‫العالم كله)‫ ، ولكن ده حصل قبل ما يكون فيه عرقيات أو أجناس أو ثقافات بمئات الألوف من السنين‫.‫ ومش معناه إطلاقاً إن الأفروسنتريك يروحوا مثلاً اليابان ويقولوا الحضارة دي بتاعتنا!‏!‏!‏ تقسيم الحضارات بدأ من بضع ألاف من السنين‫ فقط.‫ أي حاجة قبل كدة لا كان فيه حضارات ولا ثقافات ولا حتي عرقيات ‫، كان فيه أجناس مختلفة من أشباه البشر ‫، والبشر لما ظهروا أخدوا وقت طويل علشان يتطوروا إلي أعراق وثقافات مختلفة في كل أنحاء العالم‫.‫

نعم كلنا من أصول الأجداد القدماء جداً جداً إلي ظهروا في أفريقيا ‫، ولكن الياباني يظل ياباني ‫، والهندي يظل هندي والمصري يظل مصري ‫، ثقافياً وجينياً وعرقياً أيضاً‫.‫

ولذلك أنا أدعو ‫، كما دعيت من قبل أكتر من مرة ‫، علي التفريق بين دراسة الإنسان أنثروپولوجياً وبين دراسة الحضارات أركيولوجياً‫.‫ ده حاجة وده حاجة تانية خالص‫.‫ وخلطهم ببعض هو إلي بيسبب المشاكل وسوء الفهم‫.‫ زي القطعة المفروض أثرية الموجودة في المتحف المصري الكبير وعمرها سبعميت ألف سنة!‏!‏ دي مش أثر أركيولوجي ولكنها أثر أنثروپولوجي!‏!‏ لا ينسب إلي حضارات مصر ولكن ينسب للمجموعات المهاجرة القديمة إلي مكانتش بشر هومو ساپينز أصلاً!‏‫ تظل هذه الإكتشافات مصرية لأنها علي أرضنا ولكن بينها وبين الأثار الأركيولوجية فرق كبير جداً‫.‫

أتمني يكون واضح!‏!‏

https://www.facebook.com/moataz.emam.007/posts/pfbid02ebAuVRPSz64JXuDDeS7RNj5oqJaVGLXDxmKUgfrHLyQkjg8uJkY8WWkHQrbG2ftRl

مقالات أخري مشابهة‫:

بخصوص موضوع القطع الي عمرها ٧٠٠ الف سنة في المتحف الكبير:

اقترح على الاصدقاء والمتابعين يقروا عن تاريخ الهجرات البشرية. ده مجال بيدرسه علماء الانثروبولوجيا وليس علماء الاركيولوجيا. لان البشر واسلافهم عملوا هجرات كتيرة. مثلا الانسان المنتصب نشأ في افريقيا وبعدين حصل هجرات بدأت من ١،٨ مليون سنة وانتشر في العالم كله مروراً بالمضايق زي سيناء (التشكيلات الجغرافية كانت مختلفة عن النهاردة علي فكرة). وتطور الي نياندرثال وهومو سابينز وغيرهم من ما يسمون اشباه البشر وبعدين من عشرات الالوف من السنين بعد فناء كل انواع البشر الاخرى ولم يتبقى سوانا نحن الهومو سابينز سابينز حصل هجرات راجعة من اقصي الشرق لاقصي الغرب ، هي الاخيرة دي الي استوطنت فيها القبائل المهاجرة وادي النيل وشوية بشوية انشأوا انظمة الحكم الي تطورت الي دولة مصر.

لازم نفرق بين الهجرات الاولى والهجرات المتوسطة والاخيرة وبين الحاجات الي سابها المهاجرين الاوائل من ملايين الى المئات الالوف من السنين (الي مكانوش من نفس فصيلتنا اصلاً) وبين الي سابهالنا اجدادنا الي استوطنوا وادي النيل في ما بعد عند بدايات العصر الجليدي.

الحاجات الي سابها الاولانيين تدخل في نطاق الحفريات وتوضع في متاحف الجيولوجيا والانثروبولوجيا (وعندنا منهم في مصر) والحاجات الي سابها الاخرانيين هي دي الي اسمها آثار مصرية.

واضح الفرق؟

https://www.facebook.com/moataz.emam.007/posts/pfbid0VaAYi4rvTKwq5TF8xfWZtumV6RDFkeMxwBMtfcFNLvacLTNvyMqxtto6oGZEWM3tl

ملحوظة بخصوص المتحف نفسه:

القطعة الاثرية الي بيقولوا عليها عمرها ٧٠٠ الف سنة لا تعتبر اثر مصري.

شوف سيادتك ، الانسان Homo Sapiens مكانش موجود اصلاً على الكرة الارضية قبل ٣٠٠ الف سنة بالكتير ، القطعة دي وزيها الاف حول العالم لا تعتبر قطعة اثرية مصرية لانها قبل مصر وقبل الانسان نفسه. الي عملها كائن من اسلاف الانسان وليس بشر وليس مصري لان مفهوم العرقيات والدول مكانش موجود لسة. ولذلك قطعة زي دي مكانها المفروض متحف جيولوجي او انثروبولوجي جنب الحفريات وليس في متحف اركيولوجي.

فيه فرق كبير.

https://www.facebook.com/moataz.emam.007/posts/pfbid02WWLF7NJyVZRqn1JLxERxFoxUHN2DhMKFfRRwaijmA587JTwUxr44MLeMPLfrxCmul

The skull of Homo heidelbergensis, most likely our direct ancestor from the various hominid lines.

عن أبي الحبيب ‫.‫‫.‫‫.‫‫.‫

 أبي الحبيب ‫، المرحوم أستاذ دكتور حسن محمود إمام‫.‫

الراجل ده يا جماعة كان بالنسبالي زي ما بيقول الأمريكان Larger than life

ححكيلكوا قصة ‫، بس الأول خلوني أديكوا خلفية‫: بابا كان أستاذ في هندسة القاهرة وتقلد مناصب إدارية مثل‫: وكيل الكلية ‫، ثم أخر عميد منتخب للكلية ‫(‫بعد كدة بقت بالتعيين‫)‫ ثم إختاره رئيس جامعة القاهرة دكتور مفيد شهاب ليكون نائب رئيس الجامعة لشئون التعليم والطلاب‫.‫ بالإضافة لكدة شغل مناصب جانبية كتير زي مثلاً أحد قضاة محكمة القيم إلي أقامها أنور السادات فترة ‫، ده غير حصوله علي وسام العلوم والفنون من الطبقة الأولي وجايزة الدولة التشجيعية ثم جايزة الدولة التقديرية‫.‫ 

وفوق كل ده كان زوج متميز وأب عظيم ‫، أحب أمي وشالها فوق راسه علي مدار ما يقرب من خمسين سنة جواز ‫، وشال حماه وحماته كمان في سنهم المتقدمة‫ ، ده غير طبعاً والدته هو شخصياً‫.‫ إتعلمت من بابا حاجات كتير جداً جداً‫.‫ وعندي قصص كتيرة عنه بحكيها لأولادي‫.‫ بس النهاردة حابب أشارك معاكم قصة محددة أخدت فيها درس عملي رائع‫.‫

من المناصب إلي بابا تولاها كانت منصب رئيس اللجنة المختصة بتقييم المخالفات الهندسية في محافظة الجيزة بالكامل‫.‫ يعني من صميم وظيفة اللجنة إنها توقع عقوبات وقرارات إزالة علي المباني المخالفة مثلاً‫.‫ وفي يوم من الأيام ‫، عمري ما حنسي اليوم ده‫.‫ كنت قاعد جمبه في البيت ورن التليفون الأرضي ‫(‫مكانش لسة فيه موبايلات‫)‫‫.‫ بابا رد وفهمت من ردوده إنه بيكلم شخصية من كبارات رجال الأعمال في مصر أيام مبارك‫.‫ إسم كبير ومشهور‫.‫ إبتدا الحوار بصورة لطيفة ‫"‫أهلا يا فلان بيه‫"‫ وكدة‫.‫ وبعدين إبتدي الكلام يتطور ولهجة بابا إبتدي يشوبها الحدة‫.‫ عرفت بعدين إن رجل الأعمال كلم بابا علشان عنده عمارة مخالفة واللجنة إلي بابا رئيسها طلعتلها قرار إزالة‫.‫ وقعد بابا يكلم الراجل كويس ويشرحله إنه بيطبق القانون‫.‫ وفجأة إبتدت نبرة صوته تتغير ‫، وإنتهت المكالمة إن بابا بيزعق فيه ‫"‫إقفل السكة بدل ما أقفلها في وشك‫.‫‫"‫ ماكنتش محتاج أعرف ليه ‫، الراجل عرض علي بابا رشوة ‫، ورشوة كبيرة جداً زي ما عرفت بعد كدة‫.‫

بعد المكالمة حكالي وهو متعصب‫.‫ وبعدين رن التليفون تاني‫.‫

المرادي كانت المفاجأة الحقيقية‫.‫ شخص من أكبر الشخصيات السياسية في مصر وقتها‫‫: الدكتور ف‫.‫ س‫.‫

بابا طبعاً كلمه بطريقة لطيفة بس بمرور سياق المكالمة فهمت إن الشخصية الكبيرة متصلة علشان رجل الأعمال‫.‫ وطالب من بابا يلغي قرار الإزالة‫.‫ بابا إتكلم بمنتهي الهدوء وقاله ‫"‫أنا يا دكتور ‫"‫س‫"‫ بطبق القانون إلي إنتوا كدولة حطينه‫.‫ إنت في موقع يسمحلك تغير القوانين دي‫.‫ غيرها وأنا أطبق القانون الجديد مافيش مشكلة‫.‫‫"‫ وخلصت المكالمة علي رفض تام من بابا لعمل أي محاباه لأي حد مهماً كان‫ شخصه ومهماً كان إلي بيتشددله‫.‫

بعد الواقعة دي حصل حاجتين‫.‫ أولاً بابا قعد شوية وبعدين إستقال من رئاسة اللجنة ويمكن دي أخر مرة إشتغل فيها مع محافظة الجيزة‫.‫ وطبعاً قرار الإزالة لم يطبق‫‫.‫

الواقعة التانية إن بعد فترة قصيرة من المكالمات دي فجأة جرايد البلد إبتدت تنشر مقالات هجومية عن أحد أساتذة وعمداء الكليات المصريين إلي بيقبل رشاوي وبيستغل منصبه و و و مليون حاجة‫. كل يوم مقالة شكل في جريدة شكل‫ عن فساد هذا الشخص‫.‫‫ بدون ذكر أسماء محددة وبدون أي أدلة‫.‫ بس كان واضح جداً لأي حد يعرف بابا إنه هو المقصود‫.‫ حملة شعواء إستمرت فترة مش بطالة‫.‫ 

يعمل إيه بقي دكتور حسن إمام‫؟

عمل نسخة من كل المقالات دي ‫، ومعاها نسخ من أوراق رسمية تثبت إن كل كلمة في المقالات دي كدب في كدب ‫، وطبع كل الأوراق دي في ملزمة وعمل منها مئات النسخ علي حسابه‫.‫ وكان أي حد يجيله مكتبه في الجامعة أو مكتبه الخاص يديلي نسخة ويقوله انا المقصود ‫، خد إقرا دي‫.‫ ووقتها كان عميد الكلية وكان عارف إن دكتور مفيد شهاب بيفكر فيه كنائب ليه في الجامعة ‫، ودي جامعة القاهرة يعني مش أي كلام‫ ‫، ودي مناصب تعتبر سياسية.‫ فراح مكتب دكتور مفيد وإداله نسخة من الملزمة وقاله انا المقصود بالمقالات دي والأسباب الحقيقية كذا وكذا ‫‫وكذا (‫مع ذكر الأسماء‫)‫‫.‫ حبيت أقولك علشان لو أخدت قرار تبقي عارف بتختار مين وتبقي فاهم مين أعداءه‫.‫

بعدها بفترة بسيطة أصبح بابا نائب رئيس الجامعة وإنتهت فوراً الحملة المشنة عليه في الجرايد‫.‫ وفضل نائب رئيس الجامعة إلي أن طلع معاش‫.‫ ويُحكي ‫، بس دي مش أكيدة ‫، إن إسم بابا إتعرض كتير لمنصب وزير بس كان ديماً بيتشال من اللستة علشان ‫"‫مابيسمعش الكلام‫.‫‫‫"‫

الله يرحمك يا أبويا ‫.‫‫.‫‫.‫‫

كيف ندرس الفيزيا

 كيف ندرس الفيزيا‫؟

كيف ندرس الفيزيا الجزء التاني

بمناسبة الإعلان عن صورة الثقب الأسود

February 12, 2016

معلومة:

نظام ال

GPS

الي موجود في العربيات وبعض التليفونات يستخدم معادلات نظرية النسبية العامة. يعني كل مرة بيوصل سيادتك مشوار انت بتثبت صحة النظرية. النسبية العامة لم تكن بحاجة الي اعلان امس لاثباتها.

FYI:

GPS systems use the equations of Einstein's general theory of relativity. So every time you go somewhere you are proving the theory. GR did not need yesterday's announcement for validation.

https://www.facebook.com/story.php?story_fbid=10100210321545835&id=10403190&rdid=IdEwbjwVWI9Uf11o#

مصدر الصورة‫:

https://www.geotab.com/blog/what-is-gps/

الوحش

 خلينا إحنا كدة عايشين علي ذرة تراب في الكون بنتخانق مين أحسن من مين وبنقتل في بعض وبنحتقر بعض ومش دريانين إننا حرفياً ولا حاجة مقارنةً بهذا الكون الفسيح ‫(‫إلي وارد جداً يكون لانهائي أصلاً‫)‫‫.‫ وأن هذا الكون ولا هامه ولا فارق معاه سيادتك ومشاكلك اليومية وأراءك ‫ومخاوفك وأحقادك (‫ولا أستثني نفسي‫)‫‫.‫ خلينا فاكرين أن النسبة العظمي من هذه المجرة إلي إحنا فيها غير صالحة للحياة وظروفها قاتلة ليك‫.‫ خليك فاكر إن ذرة الهباء إلي إنت عايش عليها دي هي فرصتك الوحيدة في البقاء ولو دمرتها مافيش غيرها‫.‫ إلي براها مستنيك بس تغلط وحينسفك نسفاً‫.‫ جنبك ‫، حرفياً جارك ‫، علي مسافة تعتبر ولا حاجة مقارنةً بالمسافات الكونية ‫، يعيش هذا الوحش إلي كتلته تعادل أربعة ملايين كتلة الشمس بتاعتنا وتدور حوله سحابة تراب بسرعات خيالية تقترب من سرعة الضوء إلي درجة إنها تشع ‫إشعاع نستطيع رؤيته وتصويره‫.‫ معلش أخدتني الجلالة شوية علي رأي يوسف وهبي‫.‫ بقولك إيه ‫، شغل الموسيقي دي وإنت بتتفرج علي الصورة وبتتخيل ‫، أكاد أجزم إن هولست وهو بيألف عمله الخالد ‫"‫The planets" كان حيسمي الحتة دي Sagittarius A* بدلاً من تسميته ليها ‫"‫المريخ‫"‫ لو كان عنده أي فكرة عن هذا الوحش المرعب‫.‫

Holst - The Planets

سلسلة تعالوا نتكلم مزيكا

 تعالوا نتكلم مزيكا الجزء الأول

 تعالوا نتكلم مزيكا الجزء الثاني

 تعالوا نتكلم مزيكا الجزء الثالث

 تعالوا نتكلم مزيكا الجزء الرابع 

مع ماجد زكريا

 لقاءات علي التيك توك مع الأستاذ ماجد زكريا

 اللقاء الأول‫: كيف يتمدد الكون‫؟

 اللقاء الثاني‫: الأكوان المتعددة‫.‫

لاتيني ولا تغديني

 

خطر في بالي لأسباب مجهولة أحاول أجمع الي اعرفه من المقولات الي قالها علماء باللغة اللاتينية تحديداً. خلينا نجرب ولو تعرفوا اكتر حطوها في الكومنتات. حالياً علي بالي دول ، بس لو افتكرت تاني حكتبهم. دول اكتر حاجات فاكرها علشان بحكي القصص بتاعتها في محاضراتي: 

 

نيوتن:

 Hypothesis non fingo

 I frame no hypothesis

 عليطلاج معرفش يسطا

 

في كتابه الشهير ال principia علشان يقول انا معرفش ايه قوة الجاذبية ، اعرف بس امثل تأثيرها رياضياً ، انما هي ايه الله اعلم (باللاتيني).

 

جاليليو:

 eppur si muove

 But it moves

أكسمبلاه بتتحرك 

 

يقال ان بعد ما تراجع عن قوله ان الارض ثابتة لا تتحرك ولا تدور حول الشمس امام محاكم التفتيش انه وهو ماشي من قدام القضاه همس الجملة دي وسمعها احد الحاضرين ونقلها‫.‫

 

ديكارت

 Cogito Ergo Sum

 I think, therefore I am

انا افكر اذاً انا موجود 

 

يقال ان عمنا ديكارت لما حاول بكل الطرق العقلية انه يثبت انه موجود وفشل فقالك خلاص انا بفكر يبقي انا موجود وتبقي دي مسلمة في فلسفتي وخلصنا ماتوجعوش دماغي‫.‫

 

https://www.facebook.com/10403190/posts/10101246977578835/?rdid=T5558FbteEN7c4ya 

النظرية التعليمية

 

النظرية التعليمية حاجة كدة استلهمها البشر من حرفياً آلاف السنين من التجربة والخطأ. وهي الإجابة على السؤال الدائم:

حنحط مناهج التعليم إزاي وحنحط فيها إيه؟

 

طبعاً مناهج التعليم بتختلف من درجة لدرجة ومستوى لمستوى لكن المتعارف عليه هو انك بتبدأ بقاعدة عريضة جداً في ابتدائي واعدادي كل الطلبة بتدرس مختلف المعارف وبمرور الوقت يحصل تخصص اضيق فأضيق فأضيق لحد ما توصل لطرطوفة الهرم الي هي مستوى الدكتوراه.

 

طيب هل كل الي درسته في المستويات الاولى مهم ليك؟

 

هو ده السؤال.

 

والاجابة معروفة وعليها دراسات كتير.

 

اه مهم ليك. مش محتاجين نوضح الواضحات. انت مش بتتعلم بس الي انت محتاجه بصورة مباشرة انت بتتعلم الي يكون شخصيتك ويحط أسس طريقة تفكيرك. 

 

لو اتعلمت بس الي انت محتاجه بصورة مباشرة حتطلع حمااااار بيعرف يعمل حاجة واحدة بس في حياته الي هي تخصصه الدقيق. لكن باقي شخصيته فاضية ومخوخة. يا راجل ده الغاء حصص الموسيقى والرسم تأثيره واضح جداً على تفكير الناس الي اتأثرت بالالغاء ده وعايزين نرجعها وبقوة ، تقوم تقولي مانعلمهمش تاريخ وجغرافيا؟؟؟؟

 

تلاقيك انت بس كنت بتنام في الحصص دي ، وباين عليك على فكرة.

 

https://www.facebook.com/10403190/posts/10101240268054775/?rdid=DUW7N5JmQTYXlrS6 

لقاءات التيك توك المتنوعة

پروفايلي علي التيك توك‫:

https://www.tiktok.com/@moatazemam

للمهتمين بالفيزياء - اللقاء الأول 

للمهتمين بالفيزياء - اللقاء الثاني

عندك سؤال فيزيائي ‫، إسأل بتاع الفيزيا - الجزء الرابع والعشرين إستكمالاً للكلوبهاوس‫:

عندك سؤال فيزيائي ‫، إسأل بتاع الفيزيا - الجزء الخامس والعشرين إستكمالاً للكلوبهاوس‫:

عندك سؤال فيزيائي ‫، إسأل بتاع الفيزيا - الجزء السادس والعشرين إستكمالاً للكلوبهاوس‫:

مدخل إلي الإنفجار العظيم‫:

إسأل فيزيائي‫:

الأرضو كرويتون تاليفو حول نفسيها

 سؤال فيزيائي ‫، إسأل بتاع الفيزيا - الجزء السابع والعشرين:

منهجية العلم والرد علي الجهال 

لقاء قصير بمناسبة حصول دكتور نسيم علي جائزة بجامعته

إنهيار الجزء هو إنهيار الكل

العلم الزائف Pseudoscience

إجتماع المجلس الأعلي للفيزياء 

من تَمَنطَق فقد تَزَندَق

The current state of fundamental physics (a series of three talks)

In the Spring of 2024 I gave three talks in the physics department at SUNY Cortland, reporting on the current state of fundamental physics. The slides can be downloaded from links in the description of the videos:

Presentation 1 of 3: "From Euclid to Einstein, the geometry of space"

Presentation 2 of 3: "The building blocks of nature - the Standard Model of Particle Physics"

Presentation 3 of 3: "The search for a Theory of Everything"

Science is one big package

5-10-2017

Science is one big package. More interconnected than most people think. You can't pick and choose what you like and throw away what you don't. If you ever took antibiotics you can't deny evolution. If you have ever used a cell phone or GPS you can't claim the world is flat or that satellites don't exist. The same science that developed this developed that and in fact led one to the other.

https://www.facebook.com/10403190/posts/10100384975163585/?rdid=ZX22utTTNRirExja

إيه أبشع من إحساس الفشل‫؟

4-26-2022

لما تدخل تدي محاضرة في موضوع وانت اديت نفس المحاضرة ميت مرة قبل كدة بدرجات صعوبة مختلفة على مستوى سنة اولى ومستوى سنة رابعة ومستوى الدراسات العليا ، ومع ذلك تستمتع بيها وتشرح بexcitement ومتعة وانبهار بالموضوع (الي انت حافظه صم اصلاً) ساعتها تعرف انك اخترت تخصصك صح.

لما تصحى كل يوم الصبح وانت سعيد انك رايح الشغل ، ومتشوق انك تقعد تتكلم مع طلبتك وتكتب ابحاثك ، ساعتها اعرف انك اخترت صح. وعلي رأي مش عارف مين قال انك تشتغل في حاجة بتحبها مش شغل اصلاً.

نصيحة بقولها لكل الي بيسالني من الشباب الي بيدأوا حياتهم:

ادرس الي بتحبه ، ادرس الي بتحبه ، ادرس الي بتحبه.

ماتخشش كلية علشان مستخسر مجموعك.

ماتدرسش حاجة علشان هي نفسها الي والدك او والدتك درسوه. او علشان الناس بتقولك ان فيها فلوس اكتر.

ما تستسلمش لاي ضغوط غير ضغط الشغف الي بيزن عليك من جوة نخاشيش قلبك.

عارف ليه؟

لأن فيه احساس ابشع من احساس الفشل: وهو احساس انك ندمت علي انك ما جربتش.

انا عندي امشي ورا قلبي وافشل على اني اصحى في يوم بعد فوات الاوان واقول لنفسي ياريتني حاولت.

وعلى فكرة ، الاوان مايفوتش ابداً ابداً. اخترت غلط؟ غير السكة في اي وقت. بكلمك عن تجربة شخصية لم ولن اندم عليها.

 https://www.facebook.com/10403190/posts/10101017020634395/?rdid=L2kDjMquLAnYwl4B

لو أثبت العلم نظرية التطور

6-9-2021

 بسمع الكلام ده كتير‫:

‫"‫لو أثبت العلم نظرية التطور‫"‫

‫"‫لو نفي العلم نظرية التطور‫"‫

عارفين لما بسمع الجملة دي مخي بيشيل كلمة التطور وبيحط مكانها كلمات زي ‫"‫‫نيوتن"‫ ‫، ‫"‫النسبية‫"‫ ‫، ‫"‫ميكانيكا الكم‫"‫ ‫، وأقعد أضحك‫.‫

فيه إيه يا جماعة‫؟ الموضوع منتهي من زمان والنظرية مثبتة وعلي أعلي درجة من درجات اليقينية التي يسمح بها العلم التجريبي‫.‫ الموضوع ما بقاش فيه ‫"‫لو‫"‫ أصلاً‫.‫ بطلوا مقاوحة بقي وروحوا إقروا النظرية بتقول إيه ‫، وراجعوا بنفسكوا أطنان الأدلة التي تم جمعها من مختلف العلوم علي مدار 150 سنة‫.‫

لما واحد بيقولي هات دليل واحد علي صدق التطور ببقي مش عارف أقوله إيه‫.‫ دليل واحد‫؟ إنت فاكر إن ده سؤال أصلاً‫؟ بتعجزني يعني‫؟ لما نظرية يبقي عليها أطنان تراكمية ‫(‫وحط خط تحت كلمة تراكمية‫)‫ من الأدلة علي مدار 150 سنة إلي درجة إنها إنتقلت من مرحلة الإثبات والأبحاث لمرحلة الكتب الأكاديمية بتاعة سنة أولي ‫(‫‫وهذه نقلة لو تعلمون عظيمة)‫‫ الأدلة من الكم والحجم من المستحيل طبعاً أجيبلك ‫"‫دليل واحد‫.‫‫"‫ إنتوا بتتكلموا في إيه أنا بجد زهقت!‏

وبعدين تعال أقولك حاجة ‫، أنا شخصياً لما قريت النظرية من مصادر عدة وفهمتها وقعدت مع زملاء ردوا علي أسئلتي حسيت بروعة الموضوع‫.‫ الموضوع مرعب جداً ‫، لا هو صدفة ولا بطيخ‫.‫ دي process رائعة وعظيمة‫.‫ بصراحة كدة أنا كبهير إنبهرت‫.‫ يلا روح إقرا وإنبهر‫.‫ الدور عليك‫.‫

https://www.facebook.com/10403190/posts/10100936195074465/?rdid=zciy3kpexTu5M7tM

SUNY Chancellor’s Award for Excellence in Scholarship and Creative Activities 2024

SUNY Cortland Bulletin News

متلازمة النشائي

4-13-2024

متلازمة النشائي

El Naschie Syndrome

ده إسم مرض نفسي جديد أنا لسة مكتشفه من بتاع خمس دقايق كدة‫.‫ يتميز هذا المرض إنه بيصف حالة بيصاب بها بعض من درسوا العلوم الأساسية ‫(‫‫غالباً الفيزيا علشان مالهاش أهل يسألوا عليها)‫ دراسة مستفيضة وأخدوا دكتوراهات ‫(‫‫سواء معتبرة أو غير ذلك)‫ ونشروا أبحاث وبعدين فجأة ‫، فجأة كدة ‫، إذ فجأتاً ‫(‫‫مقصودة ‫، إلي حيصلحلي حبلكه)‫ ‫، يلبسهم عفريت ‫، يمكن يكون بسبب الإحساس إن الزمن بيعدي وإنهم وصلوا لأرذل العمر ولم يحققوا أحلام الشباب في إكتشاف يحقق لهم جايزة نوبل والخلود في تاريخ العلم‫.‫ تلاقي الواحد من دول يصحي الصبح في يوم ويكتشف إنه مش عبقري ولا حاجة وإنه بالرغم من علمه ده كله مش حيوصل لإكتشاف يخلده التاريخ‫.‫ 

فيعمل إيه بقي‫؟ يسكت‫؟ يكتفي بإنجازاته العلمية والأجيال إلي علمها ‫(‫‫إلي هم في رأيي أهم إنجاز ممكن أي أستاذ جامعة يحققه)‫‫؟ لأ إزاي!‏ لازم يتغلب علي إحساسه المفتعل بالفشل!‏ يروح يختار موضوع بعنوان رنان ‫، زي مثلاً توحيد النسبية العامة بميكانيكا الكم ‫‫(‫‫وده الأغلب لأنه أهم موضوع في الفيزيا اليومين دول)‫ ، ويبدأ يطرش في أبحاث كتيرة جداً ‫، كلها منقولة من بعضها البعض ‫، محتواها العلمي يقترب من الصفر ‫، وينشر في مجلات تحت بير السلم ‫، ويمكن لو معاه فلوس ‫(‫زي الشخص إلي متسمية بإسمه المتلازمة‫)‫ يأجر علماء زيه في جامعات نُص كُم ينشروا أبحاث يمجدوا فيه ويعظموا فيه ويعملوله سيتيشن علشان الإندكسات بتاعته تعلي ‫، ويمكن يفتح لنفسه مجلة علمية في دار نشر محترمة أو غير محترمة يبقي هو رئيس التحرير وينشر لنفسه علي قد مايقدر (‫‫حصل)‫.‫ ولو ما معاهوش فلوس يعمل كل دة يلجأ للسوشيال ميديا ‫، بشوية أكونتات فيك يعمل جروپات قال إيه من ناس بتقدر موهبته ‫، الجروپات دي تعظم فيه وتفخم فيه‫.‫ ويحاول كمان يطلع في الجرايد والتليڤزيونات علي قد ما يقدر ‫(‫في بلادنا طبعاً علشان بيلاقي صحفيين من السهل الضحك عليهم‫)‫ ويرفع من أسهمه ‫، ويطلع إشاعة إنه إترشح لجايزة موبل بتاعة البنزين بس المؤامرات الصهيوماسونية بتمنع فوزه‫.‫ بمرور الوقت صاحبنا ده بيصدق نفسه ‫(‫بجد‫)‫ وبيفتكر إنه يا ما هنا وياما هناك مع إن أي حد فاهم يقرا أبحاثه يلاقيها لا تستحق الحبر إلي إتكبت بيه‫.‫ ويمكن في وسط الهيصة دي كلها سمعته ترن لدرجة إن السياسيين يفتكروه فعلاً حاجة وتلاقيه فجأة بقي المستشار العلمي لرئيس دولة مثلاً‫.‫ كل ده حصل مع بعض الأمثلة علي فكرة ‫، ولو سيادتك ما تعرفش مين النشائي إلي إلي أطلقت أنا إسمه علي المرض ده ‫، ححطلك لينكات تحت‫.‫

طيب نعمل إيه مع الناس دي‫؟

ناخد بالنا منهم بس ‫، فيه علامات كتير توضح إنك بتتعامل مع شخص مريض بالمرض ده ‫، جروپات السوشيال ميديا ‫، كلامه عن نفسه كتير ‫، ليه مريدين بيدافعوا عنه بصوره محمومة ولا كأنه نبي من أنبياء الله ‫، ظهوره في الإعلام الشرقي دون الغربي ‫(‫‫مش تمجيداً في الغرب ‫، بس علشان هم عندهم صحفيين علوم حقيقيين بيعرفوا الفرق ‫، عندنا في مصر فيه صحفيين علوم كويسين جداً لكنهم قلة للأسف)‫.‫ وبعد ما نعرف هؤلاء الأشخاص نطنشهم تماماً ‫، يعني ما تجريش وراهم ‫، ما تسمعلهمش ‫، ما تديهمش قيمة‫‫.‫ سيبهم يغنوا ويردوا علي بعض‫.‫ وعلي فكرة ‫، أصحاب هذه المتلازمة بينجذبوا لبعض ‫، يعني تلاقيهم يعرفوا بعض ويستضيفوا بعض وكدة‫.‫ ‫

أما أنا فبحب أجر وراهم وألم فضايحهم ‫، صحيح هم مختلفين شوية عن أصحاب العلوم الزائفة إلي بيحطموا النسبية كل خمس دقايق ‫ولا بتوع الأرض المسطحة ، بس أنا شايف إنهم أخطر بكتير لأن دول معاهم شهادات حقيقية ‫(‫‫غالباً)‫ حتي ولو كانت من بلاد تركب الأفيال وأحياناً بيحتلوا مراكز أكاديمية مرموقة بجد ‫(‫‫لحد ما يتكشفوا ويترفدوا)‫ ولذلك ممكن الشباب إلي عايز يتعلم بجد يتأثر بيهم ويجري وراهم علشان يشرفوا علي رسايل ماستر أو دكتوراه ‫، وهنا الكارثة بتتفاقم‫.‫ علشان كدة نصيحتي حاول تبعد عنهم ‫، مافيش علاج للمتلازمة دي للأسف‫.‫

https://rationalwiki.org/wiki/Mohamed_El_Naschie

https://7hekayat.blogspot.com/2012/03/blog-post_29.html

https://www.facebook.com/moataz.emam.007/posts/pfbid02MBCQAeJcVXGY6ZhLWbrixBvBAdxFCgvSxTwU525FWporXLTps4MVUXAqjtbTmfPLl

لو سمحت يا دكتور عندي فكرة حتكسر الدنيا ‫، ممكن تساعدني ونقسم نوبل سوا‫؟

4-2-2024

 موضوع إتكلمت فيه قبل كدة كتير ‫، بس حعيد علشان إلي فاتهم‫:

 

أي حد بيشتغل في العلوم ‫(‫‫خصوصاً الفيزيا ماتفهمش ليه)‫ بتجيله رسايل كتير من نوعية‫: أنا عندي فكرة حتكسر الدنيا بس للأسف أنا مش دارس وعندي مشكلة في الرياضيات ‫، ياريت تساعدني ونقسم جايزة نوبل سوا‫.‫

 

حالياً عندي في الأزرز تلاتربع رسايل من دول‫.‫ وحرد عليهم كلهم مرة واحدة‫ هنا:

 

الإجابة المختصرة‫:

 

فكرتك غلط!‏

 

أيوة ‫، زي ما قريت كدة ‫، فكرتك غلط من غير ما أقراها‫.‫ عايز تشتغل صح‫؟ روح إدرس‫.‫ أربع سنين بكالوريوس ‫، ست او سبع سنين ماجستير ودكتوراه ‫، مرحلة أبحاث ما بعد الدكتوراه ‫، وبعد كل ده إبقي إطلع بأفكار جديدة‫.‫ لأن اي فكرة حتطلع بيها قبل كدة غلط‫.‫ من غير ما أقراها ‫، من غير ما أضيع وقتي في فهمها ‫، من غير ما أرد عليك أصلاً‫.‫ عارف إمتي تبقي فكرتك تستاهل وقتك‫؟ لما إنت نفسك تقدر تعملها بنفسك ومش محتاجني ‫، لما تبقي عندك المعرفية تشتغل إزاي ‫، ولما تبقي عارف تنشر إزاي‫.‫

 

طيب يا دكتور مش حرام عليك‫؟ مش يمكن الفكرة دي عبقرية وفعلاً صحيحة‫؟ مش يمكن الشخص ده عبقري العباقرة وفعلاً حل كل مشاكل الدنيا‫؟

 

ممكن ‫، أكيد كل شيء ممكن ‫، بس بناء علي تجربتي في العلوم إحتمالية حدوث ذلك أقل بكتير جداً جداً جداً من إحتمالية إني اكسب ميت مليون دولار من اليانصيب بكرة‫.‫ فيه إحتمال أكسب‫؟ أكيد فيه‫.‫ هل ده يستدعي إني أضيع وقتي وفلوسي علي شرا تذاكر يانصيب‫؟ لأ طبعاً‫.‫

 

طيب انا قاسي كدة‫؟ مش أحسن أقولها بطريقة ألطف‫؟ إطلاقاً ‫، العكس هو الصحيح‫.‫ لو قلتها بطريقة ألطف يبقي بغشك ‫، بديك أمل في حاجة انا عارف إنها تضييع لوقتك‫ إنت‫.‫

ودمتم‫.‫

 

 

 

https://www.facebook.com/moataz.emam.007/posts/pfbid02NtuC1d4YBLKDXP2HssgsNMuDjWJ8ibLdSHBgQSbXJMNwaSjzEK7yuR4rNFvmvS5ul

موقفي من الفلسفة

 ليا پوستات كتير علي الفيسبوك ‫في الموضوع ده ، لو دخلت علي أكونتي وعملت سيرش بس بكلمة الفلسفة حتلاقي كتير ‫، بس الپوستين دول بيلخصوا الموقف فقررت تدوينهم‫:

9-6-2022

معنديش اي تعليق اقوله ما هي الفيزيا خلاص مابقالهاش اهل يسألوا عليها.

تعديل: لأ مش قادر حعلق. طالبة الآداب دي هي واساتذتها يعرفوا ايه عن ميكانيكا الكم ومستوى الرياضيات والفيزياء المطلوب علشان بس نتكلم فيها؟ مبدأ اللايقين محتاج عمق في الكم اكبر بكتير جداً من الي بيعملوه هناك. يعرفوا ايه عن

Hilbert space

Statistical analysis

The spin statistics theorem

Classical and quantum field theories.

Commutations and non commutations, spinors, bose einstein and fermi statistics.

مليون حاجة بتاخد سنين بس علشان الواحد يتشجع ويجرؤ انه حيعمل دراسة في مبدأ اللايقين. انا تعبت بجد من بتوع الفلسفة دول واعتقادهم انهم فاهمين الطبيعة بتشتغل ازاي وتعديهم الصارخ علي تخصصات وتفاصيل محتاجة سنين وسنين ودراسات وبلاوي. كفاية بجد.

https://www.facebook.com/moataz.emam.007/posts/pfbid0MZU1rLBHKcMDUyyDortMfQT3gtZTVVd3CvqUKjXjMNKxStnLyJKMkkzrGWCA4pZhl

 *********************************************************

3-21-2024

إعادة توضيح‫ لأني قلتها قبل كدة‫:

أنا لا أكره الفلسفة!‏

صدمتكوا صح‫؟ لأن طالع عليا إشاعة إني بكرهها‫.‫ الحقيقة لأ مش بكرهها ولا بكره أي تخصص‫.‫ لكني بكره إحساس بعض المتفلسفين ‫(‫ولن أقول الفلاسفة‫)‫ أي بعض دارسي الفلسفة ‫(‫‫مهما كان حجم درجاتهم العلمية)‫ إن عندهم إستحقاقية علي العلوم التجريبية ‫، خصوصاً الفيزيا إلي بينهشوا لحمها بمنتهي الجرأة وهم مش فاهمين حاجة منها خالص‫.‫ الكلام ده ينطبق علي بعض بتوع فلسفة العلوم كمان‫.‫ يعني مش معقول يعني تكون حضرتك أستاذ خريج كلية الأداب ‫(‫مع إحترامي طبعاً‫)‫ وتقعد بمنتهي الإستحقاقية تقول العلماء التجريبيين المفروض يشتغلوا إزاي ويعملوا إيه وإنت شخص عمرك ما عملت علم تجريبي أصلاً وأخرك كتب تبسيط علوم لأن ليس عندك التدريب الكافي إنك تفهم ربع الرياضيات إلي بنستعملها في الفيزياء‫.‫ مش علشان إنت غبي ‫(‫‫لا سمح الله)‫ لكن بمنتهي البساطة مش مجالك ‫، مش حاجة درستها‫.‫ فيه سبب إن الفيزياء الحديثة محتاجة سنين وسنين من التدريب والدراسة‫.‫ كمية رياضيات ومحاضرات وإمتحانات وساعات في المعمل‫.‫ كل ده إنت ما عملتوش ‫، وبعد كدة تيجي بمنتهي الثقة إلي مش عارف جايبها منين وتقعد تفتي في تفاصيل من أعمق تخصصات الفيزيا‫؟ يا راجل‫؟ بجد‫؟ التخصصات إلي أخدت عقود علشان نفهمها بس ‫(‫‫مجرد فهم)‫ إنت جاي كدة بجرة قلم وكام كتاب تبسيط علوم وفاكر إنك تقدر تفتي وتستنبط‫؟ يسطا ده إلي درس الحاجات دي وعدي في كل المراحل دي مابيبقاش عنده نص الجرأة بتاعتك دي‫.‫ وسلملي علي تأثير داننج كروجر!‏!‏

أهو هو ده إلي بكرهه‫.‫ كنت زمان بسكت ‫، لكن خلاص بطلنا سكات‫.‫

https://www.facebook.com/10403190/posts/10101197650435825/

 *********************************************************