متلازمة النشائي

 متلازمة النشائي

El Naschie Syndrome

ده إسم مرض نفسي جديد أنا لسة مكتشفه من بتاع خمس دقايق كدة‫.‫ يتميز هذا المرض إنه بيصف حالة بيصاب بها بعض من درسوا العلوم الأساسية ‫(‫‫غالباً الفيزيا علشان مالهاش أهل يسألوا عليها)‫ دراسة مستفيضة وأخدوا دكتوراهات ‫(‫‫سواء معتبرة أو غير ذلك)‫ ونشروا أبحاث وبعدين فجأة ‫، فجأة كدة ‫، إذ فجأتاً ‫(‫‫مقصودة ‫، إلي حيصلحلي حبلكه)‫ ‫، يلبسهم عفريت ‫، يمكن يكون بسبب الإحساس إن الزمن بيعدي وإنهم وصلوا لأرذل العمر ولم يحققوا أحلام الشباب في إكتشاف يحقق لهم جايزة نوبل والخلود في تاريخ العلم‫.‫ تلاقي الواحد من دول يصحي الصبح في يوم ويكتشف إنه مش عبقري ولا حاجة وإنه بالرغم من علمه ده كله مش حيوصل لإكتشاف يخلده التاريخ‫.‫ 

فيعمل إيه بقي‫؟ يسكت‫؟ يكتفي بإنجازاته العلمية والأجيال إلي علمها ‫(‫‫إلي هم في رأيي أهم إنجاز ممكن أي أستاذ جامعة يحققه)‫‫؟ لأ إزاي!‏ لازم يتغلب علي إحساسه المفتعل بالفشل!‏ يروح يختار موضوع بعنوان رنان ‫، زي مثلاً توحيد النسبية العامة بميكانيكا الكم ‫‫(‫‫وده الأغلب لأنه أهم موضوع في الفيزيا اليومين دول)‫ ، ويبدأ يطرش في أبحاث كتيرة جداً ‫، كلها منقولة من بعضها البعض ‫، محتواها العلمي يقترب من الصفر ‫، وينشر في مجلات تحت بير السلم ‫، ويمكن لو معاه فلوس ‫(‫زي الشخص إلي متسمية بإسمه المتلازمة‫)‫ يأجر علماء زيه في جامعات نُص كُم ينشروا أبحاث يمجدوا فيه ويعظموا فيه ويعملوله سيتيشن علشان الإندكسات بتاعته تعلي ‫، ويمكن يفتح لنفسه مجلة علمية في دار نشر محترمة أو غير محترمة يبقي هو رئيس التحرير وينشر لنفسه علي قد مايقدر (‫‫حصل)‫.‫ ولو ما معاهوش فلوس يعمل كل دة يلجأ للسوشيال ميديا ‫، بشوية أكونتات فيك يعمل جروپات قال إيه من ناس بتقدر موهبته ‫، الجروپات دي تعظم فيه وتفخم فيه‫.‫ ويحاول كمان يطلع في الجرايد والتليڤزيونات علي قد ما يقدر ‫(‫في بلادنا طبعاً علشان بيلاقي صحفيين من السهل الضحك عليهم‫)‫ ويرفع من أسهمه ‫، ويطلع إشاعة إنه إترشح لجايزة موبل بتاعة البنزين بس المؤامرات الصهيوماسونية بتمنع فوزه‫.‫ بمرور الوقت صاحبنا ده بيصدق نفسه ‫(‫بجد‫)‫ وبيفتكر إنه يا ما هنا وياما هناك مع إن أي حد فاهم يقرا أبحاثه يلاقيها لا تستحق الحبر إلي إتكبت بيه‫.‫ ويمكن في وسط الهيصة دي كلها سمعته ترن لدرجة إن السياسيين يفتكروه فعلاً حاجة وتلاقيه فجأة بقي المستشار العلمي لرئيس دولة مثلاً‫.‫ كل ده حصل مع بعض الأمثلة علي فكرة ‫، ولو سيادتك ما تعرفش مين النشائي إلي إلي أطلقت أنا إسمه علي المرض ده ‫، ححطلك لينكات تحت‫.‫

طيب نعمل إيه مع الناس دي‫؟

ناخد بالنا منهم بس ‫، فيه علامات كتير توضح إنك بتتعامل مع شخص مريض بالمرض ده ‫، جروپات السوشيال ميديا ‫، كلامه عن نفسه كتير ‫، ليه مريدين بيدافعوا عنه بصوره محمومة ولا كأنه نبي من أنبياء الله ‫، ظهوره في الإعلام الشرقي دون الغربي ‫(‫‫مش تمجيداً في الغرب ‫، بس علشان هم عندهم صحفيين علوم حقيقيين بيعرفوا الفرق ‫، عندنا في مصر فيه صحفيين علوم كويسين جداً لكنهم قلة للأسف)‫.‫ وبعد ما نعرف هؤلاء الأشخاص نطنشهم تماماً ‫، يعني ما تجريش وراهم ‫، ما تسمعلهمش ‫، ما تديهمش قيمة‫‫.‫ سيبهم يغنوا ويردوا علي بعض‫.‫ وعلي فكرة ‫، أصحاب هذه المتلازمة بينجذبوا لبعض ‫، يعني تلاقيهم يعرفوا بعض ويستضيفوا بعض وكدة‫.‫ ‫

أما أنا فبحب أجر وراهم وألم فضايحهم ‫، صحيح هم مختلفين شوية عن أصحاب العلوم الزائفة إلي بيحطموا النسبية كل خمس دقايق ‫ولا بتوع الأرض المسطحة ، بس أنا شايف إنهم أخطر بكتير لأن دول معاهم شهادات حقيقية ‫(‫‫غالباً)‫ حتي ولو كانت من بلاد تركب الأفيال وأحياناً بيحتلوا مراكز أكاديمية مرموقة بجد ‫(‫‫لحد ما يتكشفوا ويترفدوا)‫ ولذلك ممكن الشباب إلي عايز يتعلم بجد يتأثر بيهم ويجري وراهم علشان يشرفوا علي رسايل ماستر أو دكتوراه ‫، وهنا الكارثة بتتفاقم‫.‫ علشان كدة نصيحتي حاول تبعد عنهم ‫، مافيش علاج للمتلازمة دي للأسف‫.‫

https://rationalwiki.org/wiki/Mohamed_El_Naschie

https://7hekayat.blogspot.com/2012/03/blog-post_29.html

https://www.facebook.com/moataz.emam.007/posts/pfbid02MBCQAeJcVXGY6ZhLWbrixBvBAdxFCgvSxTwU525FWporXLTps4MVUXAqjtbTmfPLl

لو سمحت يا دكتور عندي فكرة حتكسر الدنيا ‫، ممكن تساعدني ونقسم نوبل سوا‫؟

4-2-2024

 موضوع إتكلمت فيه قبل كدة كتير ‫، بس حعيد علشان إلي فاتهم‫:

 

أي حد بيشتغل في العلوم ‫(‫‫خصوصاً الفيزيا ماتفهمش ليه)‫ بتجيله رسايل كتير من نوعية‫: أنا عندي فكرة حتكسر الدنيا بس للأسف أنا مش دارس وعندي مشكلة في الرياضيات ‫، ياريت تساعدني ونقسم جايزة نوبل سوا‫.‫

 

حالياً عندي في الأزرز تلاتربع رسايل من دول‫.‫ وحرد عليهم كلهم مرة واحدة‫ هنا:

 

الإجابة المختصرة‫:

 

فكرتك غلط!‏

 

أيوة ‫، زي ما قريت كدة ‫، فكرتك غلط من غير ما أقراها‫.‫ عايز تشتغل صح‫؟ روح إدرس‫.‫ أربع سنين بكالوريوس ‫، ست او سبع سنين ماجستير ودكتوراه ‫، مرحلة أبحاث ما بعد الدكتوراه ‫، وبعد كل ده إبقي إطلع بأفكار جديدة‫.‫ لأن اي فكرة حتطلع بيها قبل كدة غلط‫.‫ من غير ما أقراها ‫، من غير ما أضيع وقتي في فهمها ‫، من غير ما أرد عليك أصلاً‫.‫ عارف إمتي تبقي فكرتك تستاهل وقتك‫؟ لما إنت نفسك تقدر تعملها بنفسك ومش محتاجني ‫، لما تبقي عندك المعرفية تشتغل إزاي ‫، ولما تبقي عارف تنشر إزاي‫.‫

 

طيب يا دكتور مش حرام عليك‫؟ مش يمكن الفكرة دي عبقرية وفعلاً صحيحة‫؟ مش يمكن الشخص ده عبقري العباقرة وفعلاً حل كل مشاكل الدنيا‫؟

 

ممكن ‫، أكيد كل شيء ممكن ‫، بس بناء علي تجربتي في العلوم إحتمالية حدوث ذلك أقل بكتير جداً جداً جداً من إحتمالية إني اكسب ميت مليون دولار من اليانصيب بكرة‫.‫ فيه إحتمال أكسب‫؟ أكيد فيه‫.‫ هل ده يستدعي إني أضيع وقتي وفلوسي علي شرا تذاكر يانصيب‫؟ لأ طبعاً‫.‫

 

طيب انا قاسي كدة‫؟ مش أحسن أقولها بطريقة ألطف‫؟ إطلاقاً ‫، العكس هو الصحيح‫.‫ لو قلتها بطريقة ألطف يبقي بغشك ‫، بديك أمل في حاجة انا عارف إنها تضييع لوقتك‫ إنت‫.‫

ودمتم‫.‫

 

 

 

https://www.facebook.com/moataz.emam.007/posts/pfbid02NtuC1d4YBLKDXP2HssgsNMuDjWJ8ibLdSHBgQSbXJMNwaSjzEK7yuR4rNFvmvS5ul