لينكات الفيسبوك مرفقة علشان لو حبيت تقرا التعليقات علي الپوستات الأصلية
4-14-2022
السقوط داخل ثقب اسود:
تخيل معايا ان واحد صاحبنا ، خلينا نقول اسمه حنفي ، بيسقط سقوط حر في ثقب اسود ، واحنا واقفين بعيد بنتفرج عليه (اندال بصراحة) ، اذا بدأ حنفي من مسافة r من الثقب الاسود فالمعادلة الاولى تصف الوقت الذي سنقيسه احنا لوصوله الي نصف قطر افق الحدث rs ، لاحظ ان اذا بدأ من خارج الثقب
r>rs
فلن يصل ابداً الى افق الحدث لان الزمن المحسوب يكون لانهائي ، وسنجد سرعته تقل تقل حتى يتوقف تماماً عند افق الحدث نفسه ، ويتجمد على سطحه.
الغريبة بقى ان حنفي نفسه لن يشعر بشئ ، والزمن بالنسباله حيمشي عادي خالص (المعادلة التانية) ، ولا حيبطأ ولا حيحس باي تغير في سرعته (بل انه لن يشعر انه متحرك اصلاً اذا كان مغمي عينيه ولا ينظر الى النجوم المحيطة). وحنفي حيلاقي نفسه بيعدي افق الحدث عادي خاااااالص ولا حيتجمد ولا حاجة.
ازاي يعني؟ هو عدى افق الحدث ولا ما عداش؟ سرعته قلت ولا ماقلتش؟
بالنسبالنا احنا سرعته قلت ومعداش.
وبالنسباله هو سرعته ماتغيرتش وعدى عادي.
والاتنين صح!!! ازاي يعني الاتنين صح؟ هو كدة ، مش اسمها نظرية النسبية؟ الاجابتين صحيحتين بالنسبة لكل مراقب. هي كدة مخترعتهاش انا
طيب هو مش ده يبقي اجتماع نقيضين وغير مقبول عقلاً؟
بقولك ايه ماتدخلنيش في المواضيع دي حتجيبلي الكلام .
اضافة: للي مافهمش الكلام: طبعاً مافيش اجتماع نقيضين لان الرياضيات لن تسمح بذلك اصلاً حتى وان خطر ذلك في ذهن البعض.
************************************************************
4-17-2022
الصورة الأولى:
The Schwarzschild metric:
معظم الناس الي درسوا شوية نسبية عامة بيتكلموا عن المتريك ده على انه متريك الثقوب السوداء ، والي دارس فيهم شوية زيادة يقول ثقب اسود لا يدور حول نفسه.
لكن الحقيقة ان المتريك ده اكثر عموماً من مجرد الثقوب السوداء. اي ان الثقوب السوداء حالة خاصة منه. الحقيقة ان هذا هو المتريك الذي يصف انحناء الزمكان حول اي جسم كروي متناسق متماثل كروياً لا يدور حول نفسه. بشرط ان يكون نصف قطر هذا الجسم اكبر من نصف قطر شوارزتشيلد (الصورة التانية).
أما اذا كان نصف قطر الجسم اقل من نصف قطر شوارزتشيلد هنا يصبح المتريك معبراً عن ثقب اسود.
*************************************************************
*********************************************************
************************************************************
4-26-2022
اي حد فاهم شوية نسبية عامة وسالته ماهو ال
Schwarzschild metric
غالباً حيقولك "ده المتريك الي بيصف الثقوب السوداء." اتكلمنا في بوست سابق ان ده مش صح قوي وان متريك شوارزتشيلد يصف الزمكان خارج اي جسم كروي بكثافة منتظمة. وانه يصبح ثقب اسود فقط كحالة خاصة ، ده غير انه بيصف زمكان حول جسم/ثقب اسود ثابت لا يدور.
الي عايز احكيلكوا عليه المرادي ، ايه رأيكوا ان فيه متريك شوارزتشيلد تاني؟ هو المتريك الي في الصورة ده ، وهو يصف الزمكان "داخل" جسم كروي منتظم بكثافة ثابتة كتلته الكلية M ونصف قطره a . المتريك ده اكتشفه شوارزتشيلد برضه ، ويسمى "المتريك الداخلي" ، في حين ان المتريك المشهور يسمى "المتريك الخارجي."
تفصيلة زيادة: لاحظ ان
The enterior and exterior Scwarzschild metrics smoothly and continuously connect at r=a. As long as a is larger than the Schwarzschild radius.
الصورة الاخيرة embedding diagram للاتنين متريك مع بعض يديك تصور للزمكان كاملاً داخل وخارج الجسم الكروي.
5-8-2022
هو ليه لا شئ يستطيع ان يفلت من الثقب الأسود؟
* علشان الجاذبية من القوة بحيث لو الشئ عدى نقطة معينة بيتشفط؟
* طيب اذا كان كدة ممكن نتخيل موتور قوي جداً يخلي سفينة الفضاء تستطيع الهروب.
* علشان سرعة الهروب اعلى من سرعة الضوء؟
* الكلام ده في حالة سرعة اولية تعطى للجسم لكن ممكن نتخيل تسارع للجسم مثلاً يحل المشكلة.
كل الي فوق ده اجابات مقبولة الى حدٍ ما لكنها لا تمنع التخيل ان هذه الحدود ممكن تخطيها. الحقيقة اسوأ من كل ده. الحقيقة انك لو عديت مسافة معينة (أفق الحدث) فأن سقوطك في اتجاه المتفردة يصبح حتمياً ومن المستحيل كسره او حتى تخيل امكانية ذلك. حوضحلك أكتر.
شايف المخروط الي في الصورة الاولى دي؟ ده اسمه
Light cone
وهو رسم تخطيطي للمستقبل والماضي بالنسبة لمراقب يعيش على نقطة الاصل.
يعني ايه؟ يعني كل لحظة بتعدي عليك انت في نقطة الاصل O ، وامامك خط الزمن متجه رأسياً من تحت لفوق ، المخروط الاصفر هو ماضيك والازرق هو مستقبلك. بمعنى ان اي حركة ليك متجهه الي المستقبل هي متجهة الى نقطة تقع بالضرورة داخل نطاق المخروط الازرق ومستحيل ان تتجه الي نقطة خارجه. المخروط الازرق هو مستقبلك ومصيرك لا مناص ولا محالة. ومن المستحيل ان يكون مستقبلك خارجه والا لتحطمت السببية وانهار الزمكان واتدمر الكون. انا ببالغ شوية علشان افهمك استحالة ان يكون مستقبلك خارج المخروط الازرق.
دلوقت لو اقتربت من ثقب اسود ستجد مخاريط الضوء بتاعتك دي اتجاهها يبتدي يتغير يتغير يتغير لحد ما يعدي نقطة محددة. قبل هذه النقطة المخروط الازرق بتاعك يظل مشيراً خارج الثقب يعني لسة ممكن تهرب الى نقاط خارج الثقب ولو انها تزداد صعوبة بالتدريج ، لكن اول ما تعدي النقطة دي المخاريط الزرقاء تنحني لدرجة انها تشير الى مركز الثقب الاسود فقط لاغير. بمعنى ان عبور هذه النقطة يجعل مستقبلك لامناص ولا محالة في اتجاه المتفردة في مركز الثقب. يعني استحالة تهرب من مستقبلك ومصيرك لان المخروط الازرق لا هروب منه.
الثقب الاسود مش بيشفط ، الثقب الاسود بيغير اتجاه المستقبل بالنسبة لمراقب يسقط فيه … حرفياً.
مصدر الصور: الأولى في كتابي ، التانية كنت صممتها للغلاف وبعدين غيرت رأيي وماستعملتهاش.
5-8-2022
إلحاقاً بالبوست السابق:
الصورة الأولى: رسم زمكاني للحياة في زمكان مسطح عادي زي الي انت فيه دلوقتي تقريباً. المحور الافقي: المكان
المحور الرأسي: الزمان.
لو سيادتك في النقطة A مثلاً فأن مستقبلك بالضرورة في داخل خطوط المخروط الأزرق ولايمكن يخرج عنه. يعني كل المخاريط دي تحدد مستقبل كل نقطة في هذا الزمكان. من المستحيل مثلاً ان تجد نفسك في النقطة B
الصورة التانية مخطوط للزمكان حول ثقب أسود
Schwarzschild
علي اليمين خارج الثقب المخاريط بيحصلها تغيير في الشكل بسبب انحناء الزمكان لكنها مستمرة في الاتجاه الأعلى عادي.
على اليسار داخل افق الحدث المخاريط تنقلب على جنبها وتتجه الى المتفردة في المركز. وذلك يحدث عند نصف القطر rs وهو نصف قطر أفق الحدث.
يعني لو عديت rs فمستقبلك كله الي المتفردة!
ليست هناك تعليقات:
إرسال تعليق