ألو؟ مخلوقات الكواكب الأخري؟

مافيش شك إن شهر يوليو من سنة 2015 كان شهر الإكتشافات والأحداث العلمية والتاريخية المتسارعة. في أسبوع واحد وصلنا كويكب پلوتو ، وتم إكتشاف حاجة إسمها الكوارك الخماسي ، إلي يمكن محتاج المقالة دي علشان نفهم حكايته إيه من الأول ، وبعدين فرميون فايل ، برضه محتاج شوية خلفية ، وتم إكتشاف أقدم مصحف يعود إلي عصر الرسول (ص) في متحف في إنجلترا ، وبعدين إنسان ألي روبوت إجتاز إختبار هام في الذكاء الإصطناعي ، وأخيراً وليس أخراً سمعنا خبر هام عن تخصيص مئة مليون دولار لأبحاث السيتي SETI أو

Search for Extraterrestrial Intelligence

"البحث عن ذكاء خارج الكرة الأرضية"

وهو ده الموضوع إلي عايز أتكلم عنه النهارده. إيه بقي الحكاية دي؟

إحنا عارفين إن الكون إلي إحنا فيه ده واسع قوي ، لأ بجد واسع ، واسع إلي درجة من الصعب وصفها. في أفضل التقديرات قطر الكون إلي إحنا شايفينه بس حوالي إتنين وتسعين مليار سنة ضوئية ، إلي هي تعادل حوالي 

800000000000000000000000

كيلومتر! ده رقم أكبر من تخيلك صدقني. فيه أرقام كدة مانعرفش نتخيلها. وده بس القطر إلي إحنا شايفينه. لأ وعمال يكبر ويتمدد كمان. كل هذا الوسع مليان مجرات ، أعداد ضخمة جداً من المجرات ، حاجة بتاعة مئة مليار مجرة ، كل مجرة فيها في المتوسط مئة مليار نجم ، يعني مجموع

10000000000000000000000

نجم ، وكل التقديرات والإرصادات بتقول إن معظم هذه النجوم ليها كواكب بتدور حواليها.

إيه يا عم الأرقام دي؟ أنا كنت فاكر أخرنا كويكب پلوتو وبتاع. ده الكون ده طلع بحر!

أه سيادتك وأكبر من البحر كمان.

طيب حلو قوي ، السؤال الحيوي بقي إلي أنا عمال أوضبله بقالي عشر دقايق: الكواكب دي كلها فاضية كدة؟ مافيش حياة إتكونت عليها كلها؟ مافيش مخلوقات ذكية زينا كدة عملوا تكنولوجيا وحضارات ، وليهم تاريخ وعاشوا حروب ، وعندهم أديان ومشاكل زي بتاعتنا كدة؟ معقولة يعني الدنيا الواسعة دي كلها ومافيش غيرنا؟ هو ده السؤال إلي بيسألوه الجماعة بتوع مشروع "سيتي". طيب الإجابة تبقي إزاي؟

شوف سيادتك. إحنا عدي علينا دلوقتي حوالي ميت سنة كدة من ساعة إختراع الراديو والتليڤزيون واللاسلكي والتليفونات والحاجات الجميلة إلي مانقدرش نعيش من غيرها دي (ولا عايز تقولي إنك ماتفرجتش علي مسلسلات رمضان السنادي؟). طيب الحاجات دي بتشتغل إزاي؟ بتشتغل بالموجات الكهرومغناطيسية إلي منها موجات الراديو واللاسلكي واللاذي منه. محطة التليڤزيون أو الراديو بتبعت موجات والجهاز بتاعك بيستقبلها ويحولها لصوت وصورة. طيب هل الموجات دي بتفضل علي الأرض معانا؟ لأ طبعاً ، بالعكس ده معظم الموجات دي أصلاً بيطلع من الغلاف الجوي وبتطير في الفضاء وبتبعد عن الأرض. يعني لو فيه حد في الكواكب الأخري مشغل تليڤزيون ممكن جداً يستقبل المسلسل زي سيادتك عادي. بس الفرق بينك وبينه إن الموجات دي بتاخد وقت أطول علشان توصله ، لأنه هو أبعد بكتير منك عن محطة الإرسال. إنت علشان يوصلك المسلسل علي البيت من المحطة مابياخدش ثواني ، لكن بالنسباله هو ممكن ياخد سنين وقرون طويلة بس علشان توصله. يعني ممكن سكان الكواكب الأخري يكونوا دلوقتي بس بيتفرجوا علي فوازير نيللى لأول مرة.

وبالعكس بقي ، لو هو في الكواكب الأخري وصل لنفس المرحلة التكنولوجية بتاعتك دي أو أحسن منك ، أكيد أكيد إخترع عنده حاجات زي التليڤزيون والراديو وأكيد أكيد الموجات بتاعته بتتسرب في الفضاء ، وأكيد أكيد لو سيادتك عندك إيريال قوي شوية ممكن تستقبل فوازير "خيشواقتولكانسپيترفوشتان" من المحطة التليڤزيونية الفضائية لكوكب "بيڤتاردوستينجرافونيا". يعني لو إحنا لقطنا إرسالاته دي حنعرف إنه موجود وإن حضارته علي الأقل زينا ويمكن كمان أكثر تقدماً.

طبعاً مش كل إشارة كهرومغناطيسية جاية من الفضاء معناها وجود حضارة ذكية وراها. بالعكس الغالبية العظمي من هذه الإشارات جاية من مصادر طبيعية تماماً زي إنفجارات نجمية مثلاً. طب حقولك حاجة ، لما سيادتك بتشغل راديو العربية مش علي محطة لكن بين المحطات ، مش فيه دوشة كدة "وشششششش"؟ إيه رأيك إن مصدر الدوشة دي معظمه مش من الأرض لكن من الفضاء الخارجي؟ فاكر التليڤزيونات بتاعة زمان إلي لما كان الإرسال يخلص تشوف شاشة كلها نقط بتتنطط وبتعمل "وشششششش"؟ برضه موجات كهرومغناطيسية من الفضاء. ولذلك جزء كبير جداً من شغل الناس بتوع "سيتي" إنهم يدوروا في وسط الهيصة دي كلها علي الموجات القليلة إلي مصدرها مستحيل يكون طبيعي ، لأنها مش حتكون موجات عشوائية ، حتكون فيها رسالة ، أو مسلسل تليڤزيون.

هو ده بقي مشروع "سيتي" ، نوجه أرايل قوية جداً في إتجاه الفضاء ونقعد نسمع علي أمل إننا نكتشف إننا مش لوحدنا في الكون الكبير ده. المشروع ده بقاله حوالي خمسة وخمسين سنة شغال ، وماهواش شخص واحد إلي بيشتغل فيه ولا مجموعة واحدة ، لأ دي فرق علماء مختلفة في العالم بتشتغل مع بعض. فيه مشاكل؟ أه فيه مشاكل طبعاً. من أهم هذه المشاكل مشكلة التمويل. الحاجات دي بتكلف ، بتكلف مثلاً مرتبات العلماء والطلبة إلي بيشتغلوا معاهم ، بتكلف تكنولوجيات متطورة في تقنيات الكمپيوتر ، بتكلف أكتر حاجة إيجار الأرايل العملاقة إلي عندها القوة الكافية إنها تستقبل الإرسال التليڤزيوني من الكواكب أو حتي المجرات الأخري. لأن الأرايل دي ، إلي بيسموها تليسكوپات الراديو

Radio telescopes

موجودة في كل حتة في العالم (شكلها يشبه طبق القمر الصناعي إلي في المعادي) وبتستعمل لأغراض كتير وإلي عايز يستعملها علشان يدور علي مخلوقات الكواكب الأخري لازم يشخشخ جيبه ويدفع تمن إستعمالها عدد معين من الساعات أو الأيام. والحاجات دي غالية ، مش رخيصة. ولذلك مشروع "سيتي" مشي علي مهله قوي في الخمسة وخمسين سنة إلي فاتوا ، علي مهله خالص ولسة ماسمعوش حاجة ، لأن ماحدش عايز يصرف في الموضوع ده.

لغاية الخبر إلي سمعناه إمبارح. الخبر بيقول إن ملياردير روسي إسمه "يوري ميلنر" بالتعاون مع علماء كبار من أهمهم الفيزيائي الأشهر ستيفن هوكنج عايز يتعاون مع علماء العالم إلي بيشتغلوا في مشروع "سيتي" وحيمولهم بمبلغ مئة مليون دولار أمريكي من جيبه. بالنسبة لمشروع "سيتي" ده مبلغ كبير ومش قليل ، وحينعنش المشروع جداً لمدة عشر سنين علي الأقل. الراجل ده مش عالم ، لكن بيحب العلوم جداً ، وأسس مؤسسة إسمها

Breakthrough Prize Foundation

هدفها تمويل المشاريع العلمية الصعبة ، ومؤخراً قرر هو والمؤسسة بتاعته إنهم يركزوا مع الجماعة بتوع "سيتي" ، عل وعسي نعرف أخيراً إذا كنا وحدنا في الكون ولا لأ.

الموضوع ده كبير ، كبير جداً ، لأ كبير جداً جداً. إحنا لو قدرنا نتصل بمخلوقات ذكية أخري ، أو علي الأقل نتصنت عليهم ونتأكد من وجودهم ، ده حيكون بلا أدني شك نقلة ضخمة جداً في تاريخ الحضارة البشرية. نقلة لا يضاهيها إلا حدث وجودنا علي الأرض نفسه. وتاريخ البشرية في المستقبل حيصنف "ماقبل الإتصال" و"مابعد الإتصال". ياتري هم إيه؟ يا تري في نفس تقدمنا ولا متقدمين عننا؟ يا تري لقيوا بعض لكن مالقيوناش إحنا لسه؟ ياتري بيتصلوا ببعض إزاي؟ هل بيسافروا بين النجوم والمجرات وإيه التكنولوجيا إلي بيستعملوها؟ ياتري لقيونا بالفعل لكن مطنشيننا لأننا مش قد المقام ولا إيه الحكاية؟

أسئلة كتير جداً ، وأتمني تكون الإجابة قريبة.
 بقولكوا إيه ، أنا شكلي حغير تخصصي وأشتغل في الموضوع ده ، هو تليفون "ميلنر" ده كام؟ حديله رنة.