عمو ‫، عمو ‫، إيه حكاية پلوتو دي يا عمو‫؟

تصل اليوم 14 يوليو 2015 إلي الكوكب القزم پلوتو المركبة الفضائية ‫"‫نيو هورايزونس‫"‫ أو ‫"‫أفاق جديدة‫"‫ التي أرسلتها ناسا عام 2006 بهدف الإقتراب من ودراسة ما يسمي بحزام ‫"‫كايپر‫.‫"‫‫
 

طيب إيه الحكاية دي يا عم‫؟ عامل إنت فرح علي پروفايلك في الفيسبوك وعمال تعد الأيام ‫، وباقي من الزمن معرفش كام‫ ‫، وحقابله بكرة.‫ وتعالالي يا پلوتو ‫، وناقص تنصب سرادق وتجيب رقاصة.‫ إيه الأهمية يعني‫؟ ما ‫"‫ناسا‫"‫ بتبعت مركبات كتير بنسمع عنها ‫، إشمعني دي إلي مهمة يعني‫؟
 

كلهم مهمين ‫، أنا عامل فرح بالفعل وبعمل نفس الفرح في المواقف إلي في رأيي تعتبر علامات هامة في تاريخ الإنسانية كلها.‫

طب إيه حكاية پلوتو ده وإيه حزام المش عارف إيه ده إلي بتقول عليه ‫(‫تتنطق إزاي البتاعة دي أصلاً‫)‫

پلوتو ده ‫، دوناً عن باقي أجسام المجموعة الشمسية بتاعتنا ‫، ليه قصة مهمة في تاريخ فهمنا لتطور المجموعة الشمسية‫.‫ تم إكتشافه بالصدفة سنة 1930 ‫وأعتبر أياميها الكوكب التاسع في المجموعة الشمسية ‫، ودي تصنيفة إتغيرت سنة 2006 وأصبح پلوتو كوكب قزم‫.‫ بس پلوتو مش زيه زي باقي الكواكب ‫، كان واضح من الأول إن فيه حاجة غريبة‫.‫
ليه‫؟ أقولك ليه‫‫.‫
بص يا عم الحاج‫: نقدر نقسم كواكب المجموعة الشمسية لنوعين ‫، النوع الأول هو الكواكب الداخلية ‫: عطارد ‫، الزهرة ‫، الأرض والمريخ ‫، ودول كلهم كواكب صغننة ومصنوعة من الأحجار والمعادن‫ ‫، يعني كواكب صلبة ‫(‫‫خبط كدة برجلك علي الأرض إلي إنت واقف عليها)‫.‫ النوع التاني هو الكواكب الخارجية‫: المشتري ‫، زحل ‫، أورانوس ونپتون ‫، وكلهم كواكب عملاقة الحجم مصنوع في أغلبها من الغازات ‫، يعني الأربعة دول كأنهم بالونات غاز في الفراغ‫ وممكن مايكونش ليهم سطح صلب يتوقف عليه أساساً.‫
وحكاية إن الأربعة دول من حجارة و الأربعة دول من غاز وإن دول صغيرين ودول كبار ‫، كل ده مش صدفة ‫، فهمنا للعوامل إلي كونت المجموعة الشمسية بيوضح ليه الكواكب الداخلية بتكون صغيرة وحجرية والخارجية بتكون عملاقة وغازية ‫(‫يعني من الغاز ‫، مش ‫"‫الغازية‫"‫ إلي بترقص‫)‫‫.‫ ودي قصة طويلة مش مكانها هنا‫.‫

طيب يعني إحنا فاهمين الدنيا بقي علي كدة وعارفين الكواكب عاملة كدة ليه‫؟

أه ‫عارفين ، إلا پلوتو‫ ‫، پلوتو عمل أزمة في الصورة دي.‫ لأن پلوتو جسم صغير صلب ‫، يعني المفروض يكون جوة المجموعة الشمسية معانا هنا مش بره مع الكواكب العملاقة‫.‫
يعني پلوتو بوظ الدنيا وخرج عن النظام‫.‫ طبقاً للفهم الأصلي مش مفروض يكون ليه وجود أصلاً‫.‫

ده مش بس كدة ‫، ده إكتشفوا كمان إن پلوتو طلع مش لوحده ‫، ده طلع فيه عدد مئات الألوف من الأجسام مع پلوتو كلها في الأغلب تكوينها زي پلوتو لكن أصغر‫.‫ المجموعة الضخمة دي هي إلي إسمها ‫"‫حزام كايپر‫"‫ ‫(‫إسم العالم إلي إفترض وجودها قبل ما يلاقوها‫)‫ ‫، كميات كبيرة جداً من ‫"‫الپلوتوهات‫"‫ إلي أصغر من پلوتو بتاعنا كمان‫.‫ يعني پلوتو مجرد نقطة في بحر وأهميته عندنا في تاريخ البشرية إنه كان أول واحد من أجسام حزام كايپر يتم إكتشافه ‫، لولا كدة كان حيبقي مجرد نقطة من مئات الألوف‫.‫
الفكر السائد دلوقتي إن عوامل معينة في بدايات المجموعة الشمسية أدت إلي أن مجموعة الأحجار المسماه بحزام كايپر كان المفروض إنها تتكون مع بعض وتعمل كوكب كبير ولكن لم يحدث‫.‫ ولذلك دراسة الحزام ده عن قرب حتدينا فهم أعمق بكثير لكيف تكونت المجموعة الشمسية بتاعتنا‫.‫

كل ده ملخص لأهمية زيارة نيو هورايزونس وأنصح الجميع بمتابعة الرحلة علي موقعها الرسمي‫:

http://pluto.jhuapl.edu/

ولكن بالنسبالي أنا كمان ‫، بالإضافة إلي أهمية أهداف الرحلة ‫، هناك كمان السبق التكنولوجي الرهيب في هذه الرحلات ‫، إنت متخيل كم العلم والرياضيات والهندسة والكمپيوتر ساينس إلي دخلت في تصميم وتنفيذ رحلة نيو هورايزونس وكل رحلات ناسا‫؟ متخيل‫؟
إنت متخيل إن مركبات ناسا الفضائية ماهياش زي سفن الفضاء إلي في الأفلام ‫، يعني مش حتتك علي زرار توجها في أي إتجاه إنت عاوزه ‫كأنك بتلعب پلاي ستيشن ، المركبات دي بتترمي رمياً في الفضاء وتمشي لوحدها متأثرة فقط بمجالات الجاذبية للأجسام التي تقترب منها ‫(‫محسوبة مقدماً‫)‫ ‫، لتعبر مليارات ‫(‫أيوة أنا أقصد مليارات‫)‫ من الكيلومترات وتصل إلي نقطه ضئيلة‫ علي أطراف مجموعتنا الشمسية؟ عامل كدة زي لما سيادتك تحدف زلطة من فوق سطوح العمارة بتاعتكوا وتخبط بيها إبرة علي مكتب في شقة جوة عمارة في الصين‫.‫ يعني لو الحسابات مش مظبوطة من لحظة إطلاق المركبة وهي لسة علي سطح الأرض حتتوه وعمرك ما تعرف ترجعها تاني ‫(‫‫المركبة فيها جهاز تصحيح مسار لكن صغير جداً ويستخدم فقط في أحلك الظروف)‫.‫ متخيل‫؟
مش متخيل‫؟
لأ تخيل وتعالالي‫.‫ تخيل إن المركبة ‫(‫إلي حجمها أكبر حاجة بسيطة من حجم دولاب هدومك‫ إلي في أودة نومك)‫ علي متنها جهاز كمپيوتر ومقدرات ميكانيكية لإصلاح نفسه في حالة حدوث عطل‫.‫
تخيل إن مع المركبة جهاز إسمه ‫"‫داست كاونتر‫"‫ أو ‫"‫عداد التراب‫"‫ الهدف منه جمع معلومات عن الأتربة في الفضاء الخارجي ‫، وتخيل سيادتك إن الأهم من كل ده إن إلي صمم وبني هذا الجهاز هم طلبة جامعة كولورادو في أمريكا‫؟ طلبة!‏ ط ل ب ة!‏!‏!‏!‏ يادوب 19 أو 20 سنة ‫(‫وماحطموش النسبية لسة‫)‫!‏!‏
كل ده غير الأجهزة التحليلة وأجهزة الإتصالات وخلافه‫.‫

لأ الموضوع كبير يا ريس ‫، كبير كبير مش هزار ‫، العلم والتقدم البحثي المرتبط بالرحلة دي والرحلات إلي زيها علي مستوي عالي جداً جداً ومهم جداً‫ ‫، ويعتبر من أعظم إنجازات الحضارة الإنسانية علي الإطلاق‫.‫

واحد ممكن يقولي ‫(‫الأستاذ إلي رافع إيده في الأخر ده إتفضل‫)‫‫: ‫"‫إيه يعني الفايدة إلي حتعود علينا في حياتنا اليومية‫؟ تعاظيم سلام يا علم ويا تكنولوجيا بس أنا حاخد إيه في إيدي في الأخر وأنا مروح‫.‫ فين الفكة يعني‫؟‫"‫
شوف سيادتك‫.‫ النهاردة أكيد مش حتاخد حاجة ‫، غير يمكن بس إنك ممكن تكون إتعلمتلك كلمتين حلوين ‫، لكن زي ما كان العالم الإنجليزي الكبير مايكل فاراداي بيقول ‫"‫ما هي فائدة الطفل حديث الولادة‫؟‫"‫ يقصد يعني إن أي إكتشاف في أوله مش ضروري يكون ليه فائدة عملية فورية ‫، في الأول بيكون إتعمل بس علشان العلماء عندهم فضول ‫، لكن ما تفتكرش أبداً يا عزيزي القاريء إن الحاجات دي مالهاش أهمية عملية ‫، ماهو يعني الحكومات مش عبيطة وهبلة علشان تصرف مليارات ‫(‫أيوة أقصد مليارات‫)‫ من الدولارات علي الحاجات إلي زي دي بس لمجرد إن فيه شوية علماء نفسهم فيها‫.‫ لأ يعني سيادتك‫.‫ الحكومات تعلم جيداً إن تقدم العلوم الأساسية يرتبط معه دائماً التقدم في التكنولوجيا وإن التكنولوجيا سينتج عنها تطبيقات إن أجلاً أو عاجلاً‫.‫ الأمثله كتيرة بس أنا مش حقولها ‫، إعتبر ده الواجب بتاعك بعد المحاضرة دي‫:

إجمع قائمة بالأبحاث العلمية إلي كان شكلها في الأول لا فائدة منه ولكنها أدت إلي تطبيقات عملية كثيرة وكبيرة ومهمة في الطب والهندسة والإتصالات وكل حاجة في الدنيا‫ ولا يمكن نتخيل دلوقتي حياتنا من غيرها‫.‫

عيش يا ريس وماتنساش أعمال السنة

‫_‫_‫_‫_‫_‫_‫_‫_‫_‫_‫_‫_‫_‫_‫_‫_‫_‫_‫_‫_‫_‫_‫_
مع جزيل الشكر لصديقي العزيز المهندس فادي رمزي رئيس تحرير مجلة مصري الإلكترونية ‫علي إقتراحه فكرة المقال ‫، وقد تفضل سيادته بنشر المقال في المجلة‫.‫
‫

_‫_‫_‫_‫_‫_‫_‫_‫_‫_‫_‫_‫_‫_‫_‫_‫_‫_‫_‫_‫_‫_‫_
لمزيد من التفاصيل أنصح بهذا المقال
رحلة إلي أبعد كوكب
مصادر من ناسا‫:
 http://pluto.jhuapl.edu/
http://pluto.jhuapl.edu/Mission/The-Flyby.php
http://pluto.jhuapl.edu/Mission/Where-is-New-Horizons/index.php