إحنا إلي خرمنا الزمكان

هو الحقيقة مش إحنا بالظبط ‫، هو مخروم خلقة ‫، بس القافية حبكت ‫:-‫)‫

وحشتني الكتابة علي البلوج والله ‫، ومافيش فرصة أحسن من اليومين دول إني أكتب موضوع جديد‫.‫

الحكايةإيه بقي‫؟ شوف يا سيدي‫.‫ زي ما شرحت مسبقاً هنا ‫، وهنا ‫، الفراغ إلي حوالينا في كل إتجاه علي مدد الشوف مش فراغ قوي‫.‫ إحنا عايشين في حاجة بيسموها بالعربي الزمكان ‫، أو بالإنجليزية

Spacetime

وهي ‫"‫نسيج‫"‫ ما بين الفضاء والزمن ‫(‫تبسيط مخل لكن شغال‫ ‫، شوف المقالات المذكورة أعلاه)‫‫.‫ والنسيج ده عامل زي سطح مطاط قابل للإنحناء ‫، وينحني بالفعل بوجود المادة ‫(‫‫والطاقة)‫‫.‫ يعني مثلاً وجود نجم أو كوكب يعمل إنحناء للزمكان زي كورة محطوطة علي سطح مطاط ‫، تقدر تتخيلها حاجة زي كدة‫:

 

المهم بقي هي حدود الإنحناء ده إيه‫؟ يعني الزمكان ده ممكن ينحني لحد فين‫؟ المفاجأة إن المعادلات إلي بنستنتج بيها الحاجات دي بتقول إنه ممكن ينحني إلي مالا نهاية ‫، كدهون‫: 

 

  لاحظ سيادتك إن البتاعة إلي نازلة من تحت دي ‫‫، بيسموها ‫"‫الزور‫"‫

Throat

ممتدة إلي مالانهاية‫ ‫، يعني كأنها بالفعل ‫"‫خرم‫"‫ في نسيج الزمكان!‏!‏ طبعاً كل ده للتبسيط ‫، يعني ما تاخدش الموضوع حرفياً وتسألني مثلاً طيب الزور ده نازل ‫"‫تحت‫"‫ في أي إتجاه‫.‫

المهم ‫، النتيجة الحتمية لهذا ‫"‫الخرم‫"‫ ‫، أو ‫"‫الثقب‫"‫ ‫، هو إن مافيش حاجة بتقع فيه ممكن تطلع تاني‫.‫ حتي الضوء نفسه وهو أسرع شيء في الكون ‫مايقدرش يطلع من جوة الزور لبراه‫.‫ ولذلك الأجرام إلي بتخرم الزمكان بالطريقة دي لا يمكن أن تري ‫، حتتشاف إزاي والضوء نفسه ما بيهربش منها ، ومن هنا مسمي ‫"‫الثقب الأسود‫.‫‫"‫

طيب نشوف الثقوب دي إزاي‫‫؟ فيه طريقتين‫.‫ الطريقة الأولي هي دراسة حركة الأجرام إلي نقدر نشوفها حواليها‫.‫ يعني مثلاً إذا شفت نجم من النجوم بيدور بسرعة عالية حوالين نقطة ‫"‫فاضية‫"‫ تعرف علي طول إن فيه ثقب أسود والنجم بيدور حوله زي الأرض ما بتدور حوالين الشمس‫.‫ والطريقة دي تم إستخدامها فعلاً وإكتشفنا وجود مئات الثقوب السوداء في الكون‫.‫

الطريقة التانية بتعتمد علي دراسة الحاجات إلي في طريقها للسقوط داخل الثقب الأسود‫.‫ تخيل معايا مثلاً سحابة تراب بتقع جوه الثقب‫.‫ حتلاقيها بتدور حواليه الأول وهي بتسقط بسرعات عالية جداً‫.‫ الإحتكاك بين ذرات التراب بعضها البعض بيخليها تسخن‫.‫ ولما تسخن تبتدي تشع ضوء‫ وأشعة إكس وموجات راديو‫‫.‫ ولو سيادتك صورت الإشعاعات دي بتلسكوپات تقدر تكون صورة للسحابة‫.

من كام سنة أُعلن عن ما يسمي

The Event Horizon Telescope Collaboration

وهو مجموعة علمية الهدف منها تصوير الثقوب السوداء بطريقة دراسة موجات الراديو النابعة منها‫.‫ وجم من كام يوم أعلنوا إنهم حيعقدوا مؤتمر صحفي يوم 10 إبريل 2019 الساعة 3 بعد الضهر بتوقيت القاهرة للإعلان عن أولي نتائج الدراسة‫.‫ يعني صورة حقيقية لثقب أسود‫.‫ ده مش بس كدة ‫، ده كمان الثقب الأسود إلي هم بيصوروه هو ثقب مركزي في مجرة أخري!‏‫ لاحظ إن معروف من زمان إن فيه ثقب أسود عملاق في مركز كل مجرة من المجرات إلي بنشوفها في الكون‫.‫ ودي مش صدفة وخلاص ‫، لأ ده فيه دراسات إن وجود الثقوب المركزيه دي كان ليه تأثير علي تكوين المجرات نفسها!‏ يعني من غيرها يمكن ماكانش حيبقي فيه مجرات من الأصل‫ ‫(‫‫بما في ذلك مجرتنا)‫!‏

لو كنت إتفرجت علي المؤتمر وتوقعت صورة زي إلي في فيلم Interstellar ‫ تبقي أكيد جالك خيبة أمل.‫ لأن التلسكوپات إلي بترصد موجات الراديو للثقب بتلم أرقام ‫، وبعدين الكمپيوتر بيجمع الأرقام دي في صورة يقدر يعرضها عليك‫.‫ ولذلك الناس إلي كانت متوقعة حاجة ‫"‫واو‫"‫ حيخيب ظنهم‫.‫ لكن ده ما يقللش بأي حال من الأحوال من أهمية الحدث ده‫.‫ أسيبكوا بقي مع الصورة إلي أعلنوا عنها ‫، وهي صورة الثقب الأسود العملاق في مركز مجرة M87 ‫، الدائرة الضوئية هي سحابة التراب إلي بتسقط فيه واللون بيعبر عن درجة الحرارة ‫، والدائرة السوداء في النص هي الثقب بذات نفسه‫: